Спявачка Ларыса Доліна, якая падтрымала расійскую агрэсію супраць Украіны, стала ахвярай махляроў. Яна сама прадала кватэру ў Маскве і перавяла грошы невядомым, паведамляе крыніца тэлеграм-канала SHOT.
Паводле звестак выдання, спявачка аддала зламыснікам больш за 100 млн расійскіх рублёў (1,075 млн даляраў). Сама артыстка гэтай інфармацыі пакуль не пацвердзіла.
Раніцай 13 жніўня ў кватэру народнай артысткі РФ у Хамоўніках прыехалі пяць чалавек і заявілі, што яны новыя ўласнікі. Ахоўнікі паведамілі ў паліцыю пра спробу незаконнага пранікнення ў элітны ЖК і заблакавалі ўсе выхады. «Новых уласнікаў» затрымалі на месцы. З імі цяпер размаўляюць следчыя.
Нагадаем, ураджэнка Адэсы (Украіна) Ларыса Доліна неаднаразова выказвалася ў падтрымку анексіі Крыма і поўнамаштабнай расійскай агрэсіі супраць Украіны. У студзені мінулага года Украіна ўключыла спявачку ў санкцыйны спіс «за наведванне акупаваных тэрыторый пасля пачатку ўварвання, удзел у прапагандысцкіх канцэртах, публічную падтрымку вайны і рэжыму Пуціна».
3 лютага 2023 года Доліну ўключылі ў санкцыйны спіс Канады за датычнасць да распаўсюду расійскай дэзінфармацыі і прапаганды.