Многія звярнулі ўвагу на незвычайны трап, па якім Пуцін спускаўся ў Мінску, — і назвалі яго куленепрабівальным. Ці так гэта?
24 мая 2024 у 1716556560
«Зеркало»
Чарговы візіт Уладзіміра Пуціна ў Мінск суправаджаўся сур'ёзнымі мерамі бяспекі. Паводле звестак Motolko.help, за 12 хвілін да прыбыцця расійскага борта № 1 у Мінску прызямліўся яго самалёт-двайнік, а ў паветры абодва самалёты суправаджалі два расійскія і два беларускія знішчальнікі. А пасля публікацыі кадраў сустрэчы Пуціна ў аэрапорце з'явіліся нават паведамленні (прыклады: раз, два), што Пуцін нібыта спускаўся з самалёта па куленепрабівальным трапе. Зрэшты, у апублікаваным відэа і на фотаздымках мы не ўбачылі ніякіх прыкмет таго, што гэты элемент інфраструктуры сапраўды браніраваны. Таму вырашылі разабрацца з пытаннем дадаткова.
Адкуль узялася інфармацыя пра браніраваны трап?
Навіны пра выкарыстанне Уладзімірам Пуціным браніраванага трапа з'яўляюцца рэгулярна. У 2018 годзе некаторыя СМІ сцвярджалі, што расійскі палітык спускаўся па куленепрабівальным трапе падчас візіту ў Францыю - а яшчэ для яго спецыяльна прывезлі з Расіі браніраваны лімузін «Аўрус». У тым жа годзе Пуціну прыпісвалі выкарыстанне браніраваных прыступак для выхаду з самалёта ў Аргенціне. А ў 2020-м з'явіліся паведамленні пра Пуціна і куленепрабівальны трап падчас візіту ў Ерусалім на Міжнародны форум памяці ахвяр Халакосту.
Калі сабраць усе такія паведамленні разам, сапраўды можа стварыцца ўражанне, што расійскі палітык падчас сваіх пералётаў выкарыстоўвае спецыяльныя абароненыя трапы. Ці нават возіць такі куленепрабівальны аб'ект з сабой - як тыя ж лімузіны «Аўрус».
Зрэшты, ва ўсіх гэтых выпадках нейкіх пацверджанняў таго, што Пуцін выкарыстоўвае менавіта браніраваныя трапы, не было. Акрамя хіба што фатаграфій і відэа, на якіх відаць, што ён спускаецца з борта самалёта па незвычайных на першы погляд прыступках, аточаных зверху і па баках таніраваным шклом.
Што за трапы выкарыстаў Пуцін у Мінску?
Мы не ведаем, ці сапраўды Уладзіміра Пуціна пераследуе параноя, звязаная з магчымым замахам. Але дзеля справядлівасці адзначым, што нават апошнім часам далёка не ва ўсіх пералётах ён выкарыстоўвае закрытыя трапы накшталт таго, які сустрэў яго ўчора ў Мінску. Так, у лістападзе 2023 года падчас візіту ў сталіцу Казахстана ён спускаўся па звычайным адкрытым трапе.
Адкрытым трапам Пуцін карыстаўся ў лістападзе 2023 года і ў Мінску.
І нават крытыя трапы, па якіх Пуцін спускаецца падчас некаторых візітаў, зусім не абавязкова мусяць быць браніраванымі. Звычайныя самаходныя трапы (аўтатрапы) у пасажырскіх аэрапортах часта абсталёўваюць шкляным дахам, каб абараніць людзей ад пераменлівага надвор'я.
Мы вывучылі відэа і фатаграфіі самаходных трапаў, якімі Пуцін карыстаўся падчас сваіх візітаў у Мінск. Так, у снежні 2019 года ён выкарыстаў мадэль крытага самаходнага трапа з характэрнымі металічнымі рэбрамі цвёрдасці на таніраваным шкленні.
Назвы мадэлі гэтага самаходнага трапа мы не знайшлі, але выявілі, што дакладна такія ж машыны выкарыстоўваюцца, напрыклад, для пасадкі звычайных пасажыраў у самалёты ў аэрапорце Жэневы.
Учора для сустрэчы Пуціна мінскі аэрапорт выкарыстаў ужо іншы (хоць і вельмі падобны) самаходны трап з суцэльным шкленнем секцый.
Здалёк гэты самаходны крыты трап выглядае так.
Ён вельмі падобны да трапаў, па якіх Пуцін спускаўся з борта самалёта ў 2018 годзе ў Францыі і ў 2020 годзе ў Ізраілі.
Хутчэй за ўсё, гэта французскі самаходны трап Sovam SPS9−19, які вытворца па жаданні заказчыка можа пастаўляць у VIP-камплектацыі, а таксама забяспечваць шкляным навесам, абсталяваннем для экстрэмальна халоднага надвор'я і «іншымі опцыямі на запыт». Ці нейкая вельмі падобная да яго мадэль.
Тэарэтычна можна дапусціць, што французскі вытворца пабудаваў на замову мінскага аэрапорта і трап з куленепрабівальным шклом. Але вонкава гэта цалкам звычайны крыты самаходны трап.
Ці ёсць нешта дзіўнае ў тым, што Пуцін карыстаецца крытымі трапамі?
Тым не менш частае выкарыстанне Уладзімірам Пуціным нават звычайных зашклёных трапаў выглядае досыць незвычайна. Як правіла, першыя асобы дзяржаваў падчас замежных візітаў выкарыстоўваюць для выхаду з самалётаў адкрытыя трапы. Нам, напрыклад, не ўдалося знайсці фотаздымкаў, дзе крытым трапам карыстаўся б падчас афіцыйнага візіту прэзідэнт Украіны Уладзімір Зяленскі.
Звычайным трапам спускаецца і Аляксандр Лукашэнка.
Пуцін жа карыстаецца крытымі трапамі вельмі часта. Часам гэта адбываецца ў тых жа кліматычных умовах, у якіх іншыя лідары дзяржаваў выкарыстоўваюць звычайныя адкрытыя трапы. Напрыклад, у чэрвені 2021 года Уладзімір Пуцін і прэзідэнт ЗША Джо Байдэн прыляцелі ў Жэневу, каб сустрэцца адзін з адным. Амерыканскі палітык тады выкарыстаў звычайны адкрыты трап.
А Уладзімір Пуцін на наступны дзень выходзіў з самалёта па традыцыйным для сябе крытым трапе.
Адзначым таксама, што ў многіх (але не ва ўсіх) выпадках ахова Пуціна імкнецца падагнаць браніраваныя лімузіны як мага бліжэй да спуску з крытага трапа. Выглядае, быццам ахоўнікі імкнуцца да мінімуму скараціць знаходжанне свайго падапечнага на адкрытай прасторы.
У нас няма падставаў сцвярджаць, што Уладзімір Пуцін падчас сваіх візітаў у Беларусь і іншыя краіны абавязкова выкарыстоўвае крытыя куленепрабівальныя трапы. Тым не менш меры засцярогі яго службы бяспекі сапраўды выглядаюць экстраардынарнымі ў параўнанні з тымі, якія выкарыстоўваюць ахоўнікі большасці іншых кіраўнікоў дзяржаваў.
Дзякуй, што дачыталі гэты матэрыял! «Люстэрка» называе рэчы сваімі імёнамі і не «рэтушуе» рэчаіснасці (у адрозненне ад прапаганды). Калі вы лічыце важным захаванне прафесійнай і якаснай журналістыкі для беларусаў і пра Беларусь - станьце патронам нашага праекта. Ахвяраваць любую суму можна хутка і бяспечна праз сэрвіс Donorbox.
Усё пра бяспеку і адказы на іншыя пытанні вы можаце даведацца па спасылцы.