Блогер спытаў у людзей на вуліцах Мінска, колькі грошай трэба зарабляць, каб хапала для камфортнага жыцця. Беларусы называлі сумы, якія відавочна не ўсе прадпрыемствы могуць плаціць сваім супрацоўнікам.
Хлопец правёў апытанне на вуліцах Мінска. Яго цікавіла меркаванне людзей пра тое, колькі трэба грошай на месяц, каб пражыць у Беларусі. І пры гэтым хапіла на базавыя патрэбы.
— Каб камфортна жыць, у мяне мусіць быць пенсія 3000−4000 рублёў. Гэта каб я змагла некуды з’ездзіць, дазволіць сабе адпачынак, — паведаміла беларуска.
— Мне аднаму 3000 рублёў хапае, — прызнаўся малады мужчына.
Але калі гаворка зайшла пра заробак мужчын, то лічбы трохі падраслі.
— Думаю, шмат. Калі ў Беларусі, то не менш за 2000 даляраў (6662 рублі паводле курсу Нацбанка Беларусі на 11 лістапада). А калі дзеці з’явяцца, то гэтага, напэўна, замала будзе. Гэта калі добра жыць і каб перспектыва нейкая была ў дзяцей, — адказала жанчына сярэдняга ўзросту.
— Каля 4000 рублёў (з улікам дзяцей), але гэта калі ёсць сваё жыллё. А калі арандаванае, то трэба яшчэ хаця б 1000 рублёў мець, — лічыць адна з апытаных.
— Не менш за 4000 рублёў, — адказаў мужчына.
«Люстэрка» вывучыла абвесткі ад наймальнікаў, размешчаныя ў дзяржаўнай базе вакансій. У краіне ёсць прадпрыемствы, якія адзначалі, што гатовыя плаціць супрацоўнікам ад 3000 рублёў. На 11 лістапада такіх прапановаў было 1313 (з 168 672 размешчаных вакансій). У працэнтных суадносінах гэта 0,78%. На гэтыя грошы прапануюць розную працу, як для людзей рабочых і спецыялістаў, так і для кіраўнікоў вышэйшага звяна.
Пры гэтым трэба ўлічваць, што ў абвестках наймальнікі часта агучваюць сумы да выплаты падаткаў, то-бок на рукі выйдзе менш.
Чытайце таксама
