Жонка асуджанага са Смаргоні звярнулася да Лукашэнкі. Яе абвінавацілі ў «выкарыстанні трэндаў»

Жонка асуджанага са Смаргоні звярнулася да Аляксандра Лукашэнкі з просьбай дапамагчы ў пераглядзе справы яе мужа. На дзяржаўным тэлеканале «Беларусь 1» яе абвінавацілі «ў выкарыстанні трэндаў».

У снежні мінулага года рабочыя разбіралі спісаны вілачны пагрузчык, і мачта транспарту павалілася на аднаго з іх. Другога абвінавацілі ў прычыненні смерці па неасцярожнасці. Яму далі 2,5 года „хіміі“.

Жонка рабочага, якога прызналі вінаватым, у канцы кастрычніка вырашыла звярнуцца да Лукашэнкі — і нават завяла для гэтага акаўнт у TikTok.

„У нас шматдзетная сям’я, трое дзяцей. Я ў дэкрэтным адпачынку. У судзе гэтага не ўлічылі. У мяне першыя двое дзяцей ад першага шлюбу, трэці хлопчык ад другога. Калі зачытвалі прысуд у судзе, яны палічылі толькі адно дзіця, хоць муж запісаны як айчым і з’яўляецца карміцелем сям'і“, — расказала жанчына супрацоўнікам дзяржаўнага тэлеканала.

На „Беларусь 1″ заявілі, што звяртацца да Аляксандра Лукашэнкі“ як у апошнюю інстанцыю — трэнд», але «крык душы пачулі», «на яго адрэагавалі — усё праверылі».

«На жаль, варта канстатаваць, што частка зваротаў, якія паступаюць да нас, змяшчае неаб’ектыўную інфармацыю, аргументы носяць вельмі суб’ектыўны характар. Зварот жыхаркі са Смаргоні — адзін з такіх прыкладаў. Прысуд быў абгрунтаваным, і суд падчас прыняцця рашэння ўлічыў усе абставіны справы. Падставаў для скасавання або змены рашэння ў дачыненні да яе мужа няма», — заявіў начальнік Галоўнага ўпраўлення па працы са зваротамі грамадзян і юрыдычных асоб адміністрацыі Аляксандра Лукашэнкі Рыгор Шлык.