У якія краіны могуць выправіцца на адпачынак беларусы ў аксамітны сезон, каб падоўжыць лета, і колькі гэта будзе каштаваць, вывучыў Myfin.by.
Егіпет
Гэта папулярная ў беларусаў краіна круглы год, у асноўным дзякуючы даступнасці ў цане. Курорты прымаюць гасцей у любую пару года, асабліва папулярны ў турыстаў такі від адпачынку, як падводнае плаванне. Азмрочыць адпачынак тут можа няправільна выбраны гатэль. Тураператары раяць уважліва выбіраць апартаменты, вывучаць суадносіны цаны/якасці і рэйтынг гатэля.
Паводле звестак мінскіх турфірмаў, пуцёўка ў Шарм-эш-Шэйх у сярэдзіне кастрычніка на 10 начэй у фармаце «ўсё ўключана» будзе каштаваць ад 2,5 тысячы даляраў на дваіх. Калі выбіраць чатырохзоркавы гатэль, то мінімальны кошт вырасце да 3 тысяч даляраў. Трохі зэканоміць можна, вылецеўшы ў Егіпет з Віцебска.
ААЭ
ААЭ папулярныя ў беларусаў дзякуючы цёплым водам Персідскага заліва, пясчаным пляжам на любы густ і добраму сэрвісу. Аб’яднаныя Арабскія Эміраты традыцыйна ўваходзяць у топ-5 краін, дзе адпачываюць беларусы.
«Паляцець на Фуджэйру (эмірат славіцца пясчанымі пляжамі) у сярэдзіне кастрычніка на 10 начэй будзе каштаваць каля трох тысяч даляраў на ўсё ўключана (добры гатэль). У Рас-эль-Хайме можна адпачыць у досыць добрым гатэлі за 2,6 тысячы даляраў на дваіх у аналагічны перыяд», — расказалі выданню ў адной са сталічных турфірмаў.
Турцыя
Турцыя — лідар сярод краін, дзе адпачываюць беларусы. Паляцець на турэцкія курорты можна штодня з Мінска, Брэста, Віцебска і Гомеля. З сярэдзіны кастрычніка і ў лістападзе турысты змогуць адпачыць у добрых гатэлях танней, чым летам, адзначылі ў кампаніі «Аэрабелсэрвіс».
«Напрыклад, адпачынак у адным і тым жа гатэлі ў пачатку кастрычніка на дваіх на 9 начэй будзе каштаваць 3150 еўра (курорт Сідэ, гатэль 5*), а ў лістападзе — ужо 2415 еўра. Кошт для дваіх дарослых і аднаго дзіцяці ў кастрычніку складае 3924 еўра, у лістападзе — 3000, то-бок розніца амаль у тысячу еўра, і гэта адпачынак у „пяцёрцы“», — расказалі эксперты.
Праўда, адзначаецца, што на кастрычнік многія папулярныя турэцкія гатэлі ўжо занятыя.
Гоа (Індыя)
Гэтая экзатычная мясціна знаходзіцца на заходнім узбярэжжы Індыі. Тут цёпла круглы год, але лепш туды ляцець у перыяд з кастрычніка да сакавіка. Галоўнае, што вабіць турыстаў, — трапічныя пляжы, якія расцягнуліся больш чым на 100 кіламетраў.
З Мінска тураператары прапануюць камбінаваныя туры ў Індыю. Да прыкладу, тур «Залаты трохкутнік» плюс пляжны адпачынак на 14 дзён, з якіх палову займае экскурсійны тур і палову — адпачынак на моры. У канцы кастрычніка на дваіх дарослых пуцёўка будзе каштаваць ад 3,6 тысячы даляраў. Можна выправіцца туды з Масквы чартарным рэйсам. У пачатку лістапада тур на дваіх на 10 начэй абыдзецца ад 1,5−1,6 тысячы даляраў са «сняданкамі».
Тайланд
Тайланд апошнім часам таксама стаў папулярным у беларусаў кірункам дзякуючы прыгожым пляжам, цёпламу мору і добраму выбару экскурсій. Самы даступны па цэнах курорт — Патая. Таксама запатрабаваны ў многіх падарожнікаў самы вялікі востраў краіны — Пхукет.
Адпачыць на Пхукеце ў гэты перыяд можна за суму ад 1,8 тысячы еўра на дваіх з вылетам з Масквы. Працягласць тура — 9−10 начэй. Вабіць беларусаў і тое, што візу можна зрабіць па прылёце.
В’етнам
Цяпло ў кастрычніку будзе і ў В’етнаме. Турыстаў вабіць сюды цёплы трапічны клімат, экзатычныя цікавосткі і прырода. Беларусам сюды не патрэбная віза, калі ехаць не больш чым на месяц. Паляцець у В’етнам можна на чартарных рэйсах з Масквы з перасадкай у Казахстане. У кастрычніку цэны пачынаюцца ад 2, 5 тысячы на дваіх з адпачынкам на 9−10 начэй.
Балі
Востраў Балі — адно з самых папулярных месцаў для адпачынку ў турыстаў з усяго свету. Лепш за ўсё туды ляцець сярэдзіны красавіка да канца кастрычніка, бо ў іншы час там сезон дажджоў і моцная спёка.
Мінімальны кошт тураў у кастрычніку пачынаецца ад 3,5 тысячы даляраў на дваіх. Гэта будуць рэйсы з перасадкай у ААЭ (Дубай) або Катары (Доха). Калі турыст хоча чагосьці лепшага, трэба разлічваць на суму ад 5 тысяч даляраў.
Кітайскі востраў Хайнань
Ён знаходзіцца ў Паўднёвым Кітаі, вядомы сваімі беласнежнымі пляжамі, крышталёва чыстым морам і вялікім выбарам забаваў. З кастрычніка тут пачынаецца сухі сезон, ён доўжыцца да красавіка. Беларусы могуць адпачываць тут без візаў. Прамы рэйс з Масквы («Аэрафлот») у кастрычніку абыдзецца ў суму ад трох тысяч даляраў на дваіх на 11 начэй са сняданкамі (гатэль 4*).
Чытайце таксама
