Мінінфарм запатрабаваў выключыць з продажу друкаваныя выданні, якія наносяць шкоду нацыянальным інтарэсам (якія, незразумела)

Мінінфарм запатрабаваў правесці рэвізію друкаваных выданняў і «з мэтай захавання маральных каштоўнасцяў і традыцый беларускага народа» выключыць з продажу друкаваныя выданні, распаўсюд якіх «здольны нанесці шкоду нацыянальным інтарэсам Рэспублікі Беларусь». Пра гэта паведамляе прэс-служба ведамства.

У ведамстве заявілі, што ім на пастаяннай аснове вядзецца праца «па выяўленні і недапушчэнні распаўсюду дэструктыўнай літаратуры, у тым ліку той, што ўплывае на духоўна-маральную сферу як важны складнік нацыянальнай бяспекі».

«У цяперашні час у кнігарнях, буйных гандлёвых сетках і інтэрнэт-крамах прысутнічаюць у продажы друкаваныя выданні, якія скажаюць гістарычную праўду і справядлівасць, прапагандуюць нетрадыцыйныя сэксуальныя адносіны, рэлігійную нецярпімасць, гвалт, жорсткасць і парнаграфію, якія распальваюць варожасць і нянавісць, папулярызуюць нетрадыцыйныя для беларускага грамадства субкультуры, а таксама выданні пра полавае выхаванне дзяцей, здольныя негатыўна паўплываць на іх фізічнае і псіхічнае развіццё, сказіць уяўленне пра сапраўдныя сямейныя каштоўнасці», — гаворыцца ў паведамленні.

«З мэтай захавання маральных каштоўнасцяў і традыцый беларускага народа» Мініфарм запатрабаваў ад распаўсюднікаў друкаванай прадукцыі самастойна правесці рэвізію друкаваных выданняў і выключыць з продажу выданні, распаўсюд якіх «здольны нанесці шкоду нацыянальным інтарэсам Рэспублікі Беларусь».

Якімі крытэрамі мусяць кіравацца распаўсюднікі — не паведамляецца.