«Яго арышт — пытанне часу». Падазраваны ў забойстве польскага салдата, чыёй выдачы ў Мінска патрабавала Варшава, знаходзіцца ў ЕС
Падтрымаць каманду Люстэрка
Беларусы на вайне
Читать по-русски


/

Мігрант, якога падазраюць у забойстве польскага салдата Матэвуша Сітка на мяжы з Беларуссю, знаходзіцца ў Еўрасаюзе, і ягоны арышт — «пытанне часу». Пра гэта выданню Wiadomości паведаміў генерал Аркадыюш Шкутнік, які камандуе аперацыяй «Бяспечнае Падляшша».

Польские пограничники у границы с Беларусью. Деревня Бобинка, Польша, 28 июня 2024 года. Фото: «Зеркало»
Польскія памежнікі ля мяжы з Беларуссю. Вёска Бабінка, Польшча, 28 чэрвеня 2024 года. Фота: «Люстэрка»

Аркадыюш Шкутнік на пытанне пра тое, ці ёсць новая інфармацыя пра гібель Сітка, адказаў, што пошук падазраванага ў забойстве працягваецца.

— Мы як войска не можам праводзіць расследаванне, але ў справу ўмяшаліся адпаведныя службы. Яго (падазраванага. — Заўв. рэд.) асоба высветленая. У нас ёсць яго фота, мы ведаем, дзе ён быў, дзе бывае. Новыя сігналы паказваюць, што апошнім часам ён знаходзіўся ў краінах Заходняй Еўропы, у тым ліку ў Францыі і Бельгіі, — расказаў генерал.

Паводле яго, польскія службы ідэнтыфікавалі і склалі спіс 42 найбольш небяспечных мігрантаў, якія на беларуска-польскай мяжы атакавалі салдат камянямі і абстрэльвалі з рагатак. Падазраваны ў забойстве Сітка ўзначальвае гэты спіс. Шкутнік лічыць, што яго затрыманне — пытанне часу.

— Я думаю, гэта пытанне часу, калі яго арыштуюць, — дадаў польскі вайсковец.

Нагадаем, напад мігрантаў на польскага вайскоўца адбыўся 28 траўня 2024 года: 21-гадовы сяржант Матэвуш Сітэк быў паранены і памёр у бальніцы праз некалькі дзён. Праз тое, што здарылася Польшча ўвяла 200-метровую буферную зону на мяжы з нашай краінай.

Як высветлілі польскія праваахоўнікі, нападнік — выхадзец з Блізкага Усходу. Пасля інцыдэнту яны прыйшлі да высновы, што мужчына знаходзіцца на тэрыторыі Беларусі.

У пачатку чэрвеня Польшча афіцыйна звярнулася да Мінска з просьбай дапамагчы арыштаваць падазраванага ў забойстве, аднак беларускія чыноўнікі яе праігнаравалі. У Дзяржпамежкамітэце назвалі трагедыю «нагодай для інфармацыйнага нагнятання і эскалацыі».

Польскія СМІ адзначалі, што пасля раскрыцця інфармацыі пра яго асобу нападнік можа збегчы з Беларусі ў іншую краіну, дзе злавіць яго і пасля прыцягнуць да адказнасці будзе прасцей.