Не ўсе гісторыі кахання добра заканчваюцца. Часам пасля расстання мужчыны патрабуюць у былых дзяўчат вярнуць усё, што падаравалі ім у перыяд адносін. Напрыклад, тэлефон, упрыгожанні. Пагражаюць заявай у міліцыю, судом і непрыемнасцямі. Але ці мусіць экс-каханая аддаваць прэзенты? Спыталі ў юрыста.
Юрыст сэрвісу бясплатнай і ананімнай юрыдычнай дапамогі Legalhub.help тлумачыць: паміж людзьмі, якія былі ў рамантычных адносінах і рабілі ў гэты перыяд адно аднаму падарункі, мае месца дамова дарэння.
— Згодна з ёю адзін бок (дарца) бязвыплатна перадае ці абавязваецца перадаць ва ўласнасць іншаму (абдоранаму) рэч — альбо вызваляе ці абавязваецца вызваліць абдоранага ад маёмаснага абавязання перад сабой ці трэцяй асобай. Гэта прапісана ў п. 1 арт. 543 Грамадзянскага кодэкса, — кажа суразмоўца.
Паводле спецыяліста, асноўныя прыкметы дамовы дарэння — бязвыплатнасьць і аднабаковы характар. Гэта значыць, што абавязанні паводле дамовы прадугледжаныя толькі для аднаго з удзельнікаў — дарцы. Ён мусіць перадаць рэч, маёмасныя правы ці вызваліць ад якіх-кольвек абавязанняў таго, каму ён нешта прэзентуе. Пры гэтым абдораны не абавязаны даваць наўзамен нешта эквівалентнае.
У п. 1 арт. 549 Грамадзянскага кодэкса гаворыцца, што ёсць толькі дзве акалічнасці, у якіх дарца мае права скасаваць дарэнне. Гэта калі абдораны:
- здзейсніў замах на яго жыццё, жыццё каго-небудзь з яго сямейнікаў ці блізкіх сваякоў;
- наўмысна нанёс дарцу цялесныя пашкоджанні.
Дамова дарэння можа быць як пісьмовай, так і вуснай. Паміж людзьмі ў адносінах ён у большасці выпадкаў вусны, кажа юрыст. Нягледзячы на гэта, калі былы партнёр запатрабуе вярнуць яго падарункі, закон часцей за ўсё стане на бок таго, каму ён гэтыя рэчы прэзентаваў.
— Такім чынам, атрымаўшы ў дар упрыгожанні, дарагія гаджэты, вяртаць іх пасля спынення адносін не трэба, — кажа суразмоўца.
Аднак, адзначае спецыяліст, каб лішні раз не марнаваць час і нервы, калі партнёр вам нешта дорыць, забяспечце сябе доказамі.
— Напрыклад, захоўвайце перапіску з ім, рабіце фатаграфіі перадачы падарунка, фіксуйце нагоду для ўручэння прэзента і гэтак далей, — рэкамендуе юрыст.
Чытайце таксама
