Следчы камітэт завяршыў расследаванне крымінальнай справы пра здраду дзяржаве ў дачыненні да трох жыхароў Мінска, якія рыхтавалі сацыялагічныя даследаванні, паведамілі ў прэс-службе ведамства.
Паводле версіі следства, 42-гадовы жыхар сталіцы падрыхтаваў для адной з замежных арганізацый «даследаванне, якое ўтрымлівае загадзя ілжывыя звесткі пра палітыку краіны ў галіне аховы здароўя ў частцы прыманых мер па барацьбе з каранавіруснай інфекцыяй».
«Дадзены сацыялагічны аналіз нібыта складаўся ўзначаленай ім кампаніяй, якая не мела акрэдытацыі для вывучэння названых пытанняў. Пры гэтым абвінавачаны фактычна не праводзіў аналітычнай працы ў галіне гэтай тэмы, а на падставе асобных звестак, размешчаных у адкрытых крыніцах, падрыхтаваў ангажаваныя і адпаведныя запытам „заказчыка“ вынікі для наступнага іх выкарыстання на шкоду нацыянальнай бяспецы і інтарэсам дзяржавы», — заявілі ў Следчым камітэце.
Як сцвярджаюць у ведамстве, «аналагічным чынам дзейнічалі і дзве мінчанкі (37 і 43 гадоў), якія за ўзнагароджанне праводзілі сацыялагічнае даследаванне, якое датычыць нібыта наяўнасці пераваг сярод грамадзян у развіцці краіны з дапамогай інтэграцыі з краінамі Еўрапейскага саюза». Арганізацыя, ад імені якой перадавалі звесткі абвінавачаныя, не была акрэдытаваная Камісіяй па апытаннях грамадскай думкі пры Нацыянальнай акадэміі навук Беларусі на правядзенне апытанняў сацыяльнай думкі, якія адносяцца да грамадска-палітычнай сітуацыі ў краіне.
«Акрамя таго, з мэтай дасягнення жаданага выніку жыхаркі сталіцы выкарыстоўвалі для правядзення даследаванняў фокус-групы з ліку асобаў, якія маюць, як правіла, загадзя негатыўнае стаўленне да наяўнай у дзяржаве палітычнай сістэмы і канстытуцыйнага ладу. Дадзеныя матэрыялы потым размяшчаліся ў сетцы Інтэрнэт і выкарыстоўваліся недружалюбнымі краінамі для нанясення шкоды Рэспубліцы Беларусь», — заявілі ў СК.
Арганізатара сацдаследаванняў таксама абвінавацілі ва «ўкараненні злачыннай схемы падмены працоўных адносін».
«Кіраўнік прапанаваў падначаленым аформіць сваю дзейнасць у якасці індывідуальных прадпрымальнікаў, пры гэтым далей выконваць свае працоўныя абавязкі. Такі алгарытм дзеянняў быў выгадны яму, бо праца з ІП аўтаматычна вызваляла арганізацыю ад абавязковых выплат. Следчыя выявілі, што шкода, нанесеная дзяржаве, агулам склала больш за 186 тысяч рублёў. На гэты момант яна кампенсаваная ў поўным памеры», — паведамілі ў СК.
Дзеянні абвінавачаных кваліфікаваныя па ч.1 арт. 356 КК (Здрада дзяржаве) і ч. 2 арт. 243−3 КК (Ухіленне ад выплаты страхавых унёскаў, што прывяло да нанясення шкоды ў асабліва буйным памеры). Яны ўзятыя пад варту.
Крымінальная справа перададзеная пракурору для скіравання ў суд.
У Следчым камітэце папярэдзілі, што за дапамаганне замежнай дзяржаве, міжнароднай альбо замежнай арганізацыі ці іх прадстаўнікам у правядзенні дзейнасці, скіраванай на шкоду нацыянальнай бяспецы Беларусі, пагражае да пятнаццаці гадоў калоніі.
«За такія ж дзеянні, учыненыя службовай асобай, якая займае адказнае становішча ці дзяржаўную пасаду, або асобай, на якую распаўсюджваецца статус вайскоўца, таксама прадугледжанае смяротнае пакаранне», — падкрэслілі ва ўстанове.