Беларуска паказала, які падарунак яе дзіця прывезла з навагодняй сустрэчы дзяцей з Аляксандрам Лукашэнкам: шапку і шалік з надпісам «Первый» і заплечнік з элементамі нацыянальнага арнаменту. Жанчына лічыць, што прэзент быў ад самога палітыка, але насамрэч гэты падарунак дзецям аплацілі падаткаплатнікі. Расказваем, хто зрабіў рэчы і колькі гэта каштавала.
Пра якія падарункі гаворка?
«Падарунак ад прэзідэнта Рэспублікі Беларусь» — так беларуска падпісала відэа, у якім паказала змесціва заплечніка, уручанага яе дзіцяці ў Мінску на навагоднім свяце для дзяцей, які праходзіць у рамках штогадовай акцыі «Нашы дзеці».
«Падарункі ад Прэзідэнта» — так іх назвала яшчэ адна мама дзяўчынкі, што пабывала на гэтым жа мерапрыемстве.
Сапраўды, сувеніры дзецям уручылі з прапагандысцкага мерчу, які дзяржпрадпрыемствы выпускаюць з цытатамі Аляксандра Лукашэнкі. Каб атрымаць іх, дзецям давялося выслухаць даволі доўгую прамову палітыка.
Хто аплаціў падарункі?
Аднак відавочна некарэктна казаць, што гэта падарункі ад імені палітыка: ён не купляў іх за свае грошы. Аплацілі вытворчасць, як вынікае з заявак на сайтах дзяржзакупак, з бюджэту краіны, то-бок прэзенты дзецям забяспечылі падаткаплатнікі.
Напрыклад, вытворчасцю заплечніка займалася кампанія «Галантэя» на замову «Нацыянальнага цэнтра мастацкай творчасці дзяцей і моладзі» Мінадукацыі. Усяго яна пашыла іх 2400 штук, вынікае з дакументаў заяўкі. І заплацілі ёй з бюджэту за гэта 132 тыс. рублёў. Такім чынам, адзін заплечнік каштаваў 55 рублёў.
Вытворчасцю шапкі і шаліка з прапагандысцкім лагатыпам займалася Пінскае прамыслова-гандлёвае аб’яднанне «Палессе». Гэта відаць як на этыкетцы на відэа ў TikTok, так і ў звестках дзяржзакупкі. Надпіс «Первый» на іх — гэта не выпадковасць: менавіта такое патрабаванне было ў тэхнічным заданні «Нацыянальнага цэнтра мастацкай творчасці дзяцей і моладзі» Мінадукацыі.
Прадпрыемства пашыла 2400 шапак і столькі ж шалікаў. Агулам за гэта заплацілі з казны 102 902,4 рубля. Выходзіць, што кожны набор каштаваў амаль 42,9 рубля.
Акрамя гэтага, у заплечніку быў набор цукерак. Іх закупілі ў «Камунаркі». 2400 набораўкаштавалі 69 955,2 рубля, або 29 рублёў за адзін.
Нагадаем, мерч Лукашэнкі ў Беларусі пачалі выпускаць у апошнія гады. Яго рэкламуюць многія дзяржмедыя і носяць прапагандысты. У жніўні 2022 года старшыня канцэрна «Беллегпрам» Таццяна Лугіна расказала, што ўсе фразы, якія выкарыстоўваюцца для мерчу Лукашэнкі, асабіста з ім узгадняюцца. Да крамы гэтага брэнда мае дачыненне былы хакеіст Дзмітрый Баскаў (ён мог прысутнічаць на «Плошчы перамен» 11 лістапада 2020 года, дзе быў збіты Раман Бандарэнка).
Чытайце таксама
