Двое мужчын у Баранавічах шукалі адзінокіх уладальнікаў кватэр, якія вялі асацыяльны лад жыцця і мелі пазыкі па камунальных плацяжах, уціраліся да іх у давер і перасялялі пацярпелых у старыя дамы, а кватэры па даверанасці прадавалі. Усе грошы фігуранты трацілі на асабістыя патрэбы. Падрабязнасці справы «шэрых рыэлтараў» расказалі ў Следчым камітэце.
«На пачатковым этапе следства было вядома, што фігуранты падманам завалодалі жыллём двух грамадзян, пасля чаго кватэры прадалі. Пацярпелых жа перасялілі ў таннейшыя дамы, а астатнюю суму ад угодаў з нерухомасцю падзялілі паміж сабой», — расказалі ў СК.
Падчас расследавання крымінальнай справы следчыя раскрылі ўсю ашуканскую схему, ролю кожнага з фігурантаў, а таксама пацярпелых, якія сталі ахвярамі «бізнесоўцаў». Аказалася, што ўсяго мужчыны падманулі 11 чалавек на агульную суму больш чым 470 тысяч рублёў.
Паводле матэрыялаў следства, у кастрычніку 2022 года 47-гадовы жыхар горада прыдумаў план па адбіранні жылля ў людзей. У свой «бізнес» ён паклікаў 31-гадовага знаёмага. Галоўную ролю граў ён сам: шукаў адзінокіх старых, якія былі ў цяжкім матэрыяльным становішчы і вялі асацыяльны лад жыцця, і прапаноўваў дапамагчы пагасіць пазыкі і прадаць кватэру. Яго знаёмы займаўся тэхнічнай часткай схемы: суправаджэннем падчас перамоваў, размяшчэннем у інтэрнэце абвестак пра продаж кватэр, а таксама дастаўкай пацярпелых у натарыяльныя канторы і афармленнем угоды куплі-продажу.
«Пацярпелых перасялілі ў малапрыдатныя для жылля старыя дамы без каналізацыі, ацяплення і электраэнергіі. Трое з пацярпелых, пражываючы ў нечалавечых умовах, пасля памерлі», — дадалі ў СК.
На стадыі следства арганізатар віны не прызнаў, заявіўшы, што выканаў абавязанні перад «кліентамі». Яго змоўшчык часткова прызнаў сваю віну, патлумачыўшы, што яму плацілі невялікія грошы, але не за продаж кватэраў, а за тое, што ён прыводзіў іх у парадак, і за тэхнічныя паслугі.
Маёмасць абвінавачаных арыштавалі (гэта ў асноўным нерухомасць) і прадалі, такім чынам шкода пацярпелым цалкам кампенсаваная.
Да суда фігуранты застануцца пад вартай.
Чытайце таксама
