У сацыяльных сетках днямі распаўсюдзіўся дыпфэйк, у якім з’явіўся кіраўнік Нараўлянскага райвыканкама і заявіў, што ў раёне нібыта ўводзіцца каменданцкая гадзіна з прычыны ўсё часцейшых пралётаў беспілотнікаў. У выканкаме гэта абверглі, адзначыўшы, што відэа падробленае, паведамляе дзяржтэлеканал «Беларусь 1».
Тым часам першы намеснік міністра інфармацыі Беларусі Андрэй Кунцэвіч прапанаваў сваё меркаванне, навошта распаўсюджваюцца такія фэйкавыя ролікі.
«Мэты, на мой погляд, відавочныя — разгайдаць сітуацыю ў краіне, падарваць дзяржаўныя і канстытуцыйныя асновы нашай краіны», — сказаў Кунцэвіч.
Ён дадаў, што «гэта не нейкія нявінныя свавольствы жартаўнікоў-айцішнікаў. Гэты факт — яскравае пацверджанне таго, што Беларусь і інфармацыйнае поле Беларусі падвяргаюцца рэгулярнаму дэструктыўнаму інфармацыйна-псіхалагічнаму ўздзеянню».
Кунцэвіч лічыць, што з развіццём тэхналогій штучнага інтэлекту якасць такіх падробак будзе толькі ўзрастаць, а выявіць іх усё складаней, але рэальна. Ён патлумачыў, як дзейнічалі ў выпадку з Нароўляй.
«Ну, да прыкладу, з той жа Нароўляй сітуацыя была досыць аператыўна купіраваная дзякуючы таму, што старшыня выканкама выйшаў да рэгіянальных СМІ з абвяржэннем. Акрамя таго, журналісты раённай газеты аб’ехалі вуліцы горада і паказалі ўсім, што ніякага надзвычайнага становішча ў горадзе не ўведзена», — растлумачыў ён.