Ігар Кізім можа быць прызначаны спецыяльным прадстаўніком Украіны па Беларусі. Пра гэта Reform.by паведаміла крыніца, знаёмая з сітуацыяй.
Паводле інфармацыі выдання, прызначэнне зацягнулася. Кізім у новым статусе мусіў удзельнічаць у сустрэчы АПК са спецпрадстаўнікамі Эстоніі, Швецыі, Польшчы і Літвы на мінулым тыдні.
Кізім быў апошнім амбасадарам Украіны ў Беларусі — з лютага 2017 года да 22 чэрвеня 2023 года. Указам прэзідэнта Украіны ён быў вызвалены ад пасады. У красавіку 2023 года МЗС Украіны асудзіў сустрэчу Аляксандра Лукашэнкі з кіраўніком акупацыйнай адміністрацыі Данецкай вобласці Дзянісам Пушыліным. Ведамства расцаніла яе як спробу яго легітымізацыі і адклікала Ігара Кізіма для кансультацый.
Інфармацыю пра магчымае прызначэнне Ігара Кізіма на пасаду спецпрадстаўніка пацвярджаюць і крыніцы Анатоля Лябедзькі ў Вярхоўнай радзе. Паводле яго інфармацыі, рашэнне будзе прынятае найбліжэйшым часам. Пра гэта напісаў звязаны з палітыкам тэлеграм-канал «Парламентский Канал».