У Беларусі са снежня запрацуе адразу некалькі змяненняў што да разліку і аплаты жыллёва-камунальных паслуг. З наступнага месяца таксама пачнуць дзейнічаць абноўленыя максімальныя раздробныя цэны на яблыкі і некаторую гародніну. У снежні беларусы таксама мусяцьдаведацца, што будзе з падаткамі ў 2025 годзе. «Люстэрка» склала падборку новаўвядзенняў, якія запрацуюць у наступным месяцы і могуць паўплываць на таўшчыню кашалькоў людзей.
Новаўвядзенне па цэнах
У снежні будуць дзейнічаць новыя максімальныя раздробныя цэны на яблыкі і некаторую гародніну — свежыя агуркі, рэпчатую цыбулю, белакачанную капусту, а таксама бульбу, сталовыя буракі, моркву (апошнія тры пазіцыі — за выключэннем мытага тавару). То-бок гаворка пра цэны, якія бачаць пакупнікі ў крамах.
Да прыкладу, свежыя агуркі ў лістападзе можна прадаваць у крамах не даражэй за 6,58 рубля за кілаграм, а ў снежні — 8,85 рубля. Што да яблыкаў, то ў лістападзе максімальная раздробная цана на іх можа даходзіць да 2,79 рубля, у снежні — да 3,13 рубля.
Даведаемся, што будзе з падаткамі ў 2025 годзе
У канцы снежня ўлады, як правіла, паведамляюць, якія змены ўносяць у Падатковы кодэкс. На 2025 год запланавана нямала падатковых змяненняў. Сярод іх — карэктаванне транспартнага збору, павышэнне падатку на першую кватэру.
Што зменіцца па камуналцы
Урад увядзе абмежаванні па пераразліку плацяжоў за некаторыя жыллёва-камунальныя паслугі для тых, хто не жыве ў сваім жыллі больш за дзесяць сутак. Гаворка як пра выезд за мяжу, так і пра перамяшчэнне ў межах краіны. Урад вызначыў, што перагляд плацяжоў са снежня будзе магчымы не больш чым за тры гады, а цяпер гэты тэрмін не абмежаваны.
Саўмін з 1 снежня таксама ўвядзе некаторыя карэкціроўкі ў гэтую схему барацьбы з даўжнікамі за ЖКП. Так, патрабаваць аплаты такім спосабам змогуць не толькі камунальнікі, але і арганізацыі, якія займаюцца эксплуатацыяй жыллёвага фонду (да прыкладу, таварыства ўласнікаў). У апошнім выпадку — за карыстанне жылым памяшканнем.
З 1 снежня ўладальнікам некаторых кватэр будуць таксама па-новаму налічваць плацяжы за спажытыя жыллёва-камунальныя паслугі. Змяненне ўводзяць для недзеяздольных людзей, якія пастаянна жывуць ва ўстановах сацыяльнага абслугоўвання. Да прыкладу, у сацыяльных пансіянатах.
Вываз смецця па-новаму
Са снежня запрацуюць новыя правілы ўтылізацыі будаўнічых адходаў. Так, смецце, што ўтвараецца падчас рамонту, трэба будзе аддзяляць ад іншых відаў адходаў. Для гэтага будуць ставіць кантэйнеры ёмістасцю ад 6 кубаметраў і ўладкоўваць асобныя секцыі на спецыяльна адведзеных пляцоўках. Таксама паведамляецца, што з 1 снежня вываз будаўнічых адходаў будзе адбывацца асобна па ўстаноўленых тарыфах. Новаўвядзенні не паўплываюць на павелічэнне выдаткаў для насельніцтва, запэўніваюць у Міністэрстве жыллёвай гаспадаркі.
Кіроўцы могуць атрымаць штраф за летнюю гуму
З 1 снежня кіроўцы могуць атрымаць папярэджанне ці штраф да адной базавай велічыні (40 рублёў) за язду на аўтамабілі з летнімі шынамі. Калі ж кіроўцу спыняць за эксплуатацыю летніх шын паўторна, то сума штрафу складзе ад 2 да 5 базавых велічынь (ад 80 да 200 рублёў).
Падаражанне цыгарэт
У Беларусі з 1 снежня падаражэюць некаторыя маркі цыгарэт. У продажы таксама з’явяцца новыя цыгарэты. «Тытунь-Інвест» сярод іншага павысіць на 10 капеек цану марак «Карона», «Карона блакітная» — да 3,65 рубля, на 20 капеек — «Карона стыль», «Карона эліт» (да 3,6 рубля).
Чытайце таксама
