З мінчука паводле рашэння суда спагналі пазычанасць на карысць былога зяця, пасля гэтага жонка даўжніка перапісала на дачку ўсю нажытую ў шлюбе маёмасць. Тая з’ехала ў Польшчу, а пракуратура адмяніла ўгоду дарэння, абгрунтаваўшы гэта тым, што новая ўладальніца не карысталася атрыманай уласнасцю.
Муж і жонка з 1999-га да лістапада 2023 года былі ў шлюбе, у якім сумесна нажылі маёмасць — яна складалася з двух зямельных участкаў і лецішча пад Дзяржынскам, а таксама аўтамабіля Opel Corsa.
Суд Заводскага раёна Мінска 3 красавіка 2023 года спагнаў з мужчыны на карысць былога зяця 29 тысяч рублёў у якасці доўгу. Выканаўчы дакумент пра спагнанне гэтай сумы 1 чэрвеня таго ж года паступіў у аддзел прымусовага выканання (АПВ) Маскоўскага раёна сталіцы.
Праз некалькі дзён пасля вынясення судовага рашэння — 7 і 8 красавіка 2023 года — жонка мінчука-даўжніка аформіла дамовы дарэння, згодна з якімі права ўласнасці на ўсю супольную нажытую ў шлюбе маёмасць перайшла дачцэ пары.
Новая ўласніца ў ліпені таго ж года з’ехала ў Польшчу.
«Пры гэтым як да здзяйснення ўгодаў, так і пасля іх заключэння гэтай маёмасцю не карысталася», — адзначылі ў пракуратуры.
Там нагадалі, што згодна з п. 1 арт. 171 Грамадзянскага кодэкса ўяўная ўгода, то-бок угода, заключаная толькі для выгляду, без намеру стварыць адпаведныя ёй юрыдычныя наступствы, нікчэмная.
У выніку пракурор падаў у суд у інтарэсах атрымальніка доўгу пазоў пра ўстанаўленне факту нікчэмнасці дамоваў дарэння, а таксама пра прызнанне несапраўднай дзяржрэгістрацыі пераходу права ўласнасці на маёмасць і спагнанне з адказчыкаў судовых выдаткаў.
Усе патрабаванні задаволеныя ў поўным аб’ёме. Рашэнне суда ўступіла ў законную сілу.