Райвыканкамы рассылаюць у падведамныя ўстановы Гомельскай вобласці ўказанні, звязаныя з працай экранаў у арганізацыях і на прадпрыемствах. Як даведаўся «Флагшток», ідэолагі паставілі задачу забяспечыць працу тэлевізараў, інфармацыйных панэляў і іншых падобных электронных прыладаў без іх падключэння да інтэрнэту.
Патрабаванне перавесці экраны ў аўтаномны рэжым можа сведчыць пра боязь уладаў, што паўторыцца сітуацыя, калі ў другую гадавіну пачатку поўнамаштабнай вайны РФ супраць Украіны, 24 лютага, у мінскім метро трансляваўся зварот Святланы Ціханоўскай. Тады сістэма рэкламных экранаў была ўзламаная з-за мяжы праз інтэрнэт.
Гэтае патрабаванне ідэолагаў з’явілася незадоўга да прэзідэнцкіх выбараў, якія ёсць фармальнай працэдурай пераабрання Аляксандра Лукашэнкі. У перыяд кампаніі ўлады баяцца любой праявы нязгоды з дзеяннямі рэжыму.
Такім чынам чыноўнікі на месцах могуць перастрахоўвацца пасля заявы Лукашэнкі пра тое, што ў выпадку неабходнасці ён дасць указанне адключыць у Беларусі інтэрнэт.
Акрамя забяспечання аўтаномнай працы экранаў ідэолагі таксама запатрабавалі правесці мадэрацыю кантэнту, які транслюецца ў арганізацыях і на прадпрыемствах.