Ракета «Арэшнік», якой Расія ўдарыла па ўкраінскім горадзе Днепр, несла некалькі боегаловак, але была без выбухоўкі. Пра гэта Reuters паведамілі дзве высокапастаўленыя крыніцы ва ўрадзе Украіны.
Адна з крыніц заявіла, што ракета несла вучэбную боегалоўку, і ахарактарызавала нанесеную ёю шкоду як «даволі невялікую».
«У гэтым выпадку (ракета) была без выбухоўкі… Не было ніякіх выбухаў, якіх мы чакалі. Нешта было, але не вельмі моцнае», — расказала другая крыніца.
Агенцтва таксама прыводзіць словы экспертаў, якія патлумачылі, што адсутнасць выбуховых рэчываў у «галаўной частцы» ракеты пакідае месца для прыбораў, якія могуць выкарыстоўвацца для ацэнкі яе характарыстык.
Прэзідэнт Расіі Уладзімір Пуцін у трансляцыі, якую вяла яго прэс-служба 21 лістапада, заявіў, што армія Расіі нанесла ўдар адной з найноўшых ракетных сістэм сярэдняй далёкасці — балістычнай ракетай у бяз’ядзерным абсталяванні пад назвай «Арэшнік». Пазней ён паведаміў, што прынятае рашэнне пра серыйную вытворчасць гэтых балістычных ракет.
Паводле ацэнак заходніх экспертаў, «Арэшнік» — відавочна, вытворны ад балістычнай ракеты РС-26 «Рубеж».
Далёкасць палёту такой ракеты складае больш за 5000 км, хоць ракета, якая ўразіла Украіну, праляцела ўсяго каля 700 км.
«Я б сказаў, што гэта неймаверна дарагі спосаб нанесці, магчыма, не такую і вялікую шкоду», — прыводзіць Reuters словы амерыканскага эксперта Джэфры Льюіса — дырэктара Цэнтра даследаванняў нераспаўсюду зброі масавага знішчэння імя Джэймса Марціна.
Нагадаем, паводле заявы камандавання Паветраных сіл Украіны, Расія раніцай 21 лістапада нанесла ўдар міжкантынентальнай балістычнай ракетай па горадзе Днепр. У гэтым горадзе знаходзіцца завод «Южмаш» — буйное ўкраінскае прадпрыемства па вытворчасці ракетна-касмічнай тэхнікі і іншай навукаёмістай прадукцыі.
22 лістапада Галоўнае разведвальнае ўпраўленне Украіны заявіла, што Расія нанесла ўдар па Дняпры, выкарыстаўшы балістычную ракету, імаверна, са складу ракетнага комплексу «Кедр».
