Міністэрства абароны Расіі заявіла, што 30 снежня ў выніку перамоваў Расія і Украіна абмяняліся ваеннапалоннымі па формуле «150 на 150». Украінскі бок удакладняе, што ім удалося вярнуць з расійскага палону 189 чалавек, у тым ліку дваіх цывільных.
«У цяперашні час усе расійскія вайскоўцы знаходзяцца на тэрыторыі Рэспублікі Беларусь, дзе ім аказваецца неабходная псіхалагічная і медыцынская дапамога, а таксама дадзеная магчымасць звязацца са сваякамі», — гаворыцца ў паведамленні Мінабароны РФ.
Расійскае ведамства таксама падзякавала за пасярэдніцтва ў абмене Аб’яднаным Арабскім Эміратам, удакладніўшы, што неўзабаве ўсе вайскоўцы будуць дастаўленыя ў Расію.
Прэзідэнт Украіны Уладзімір Зяленскі ў сваім тэлеграм-канале напісаў, што з палону напярэдадні Новага года вернутыя 189 чалавек.
«Гэта вайскоўцы — абаронцы „Азоўсталі“ і Марыупаля, ЧАЭС, вострава Змяінага, з розных напрамкаў фронту. Сярод іх салдаты, сяржанты, афіцэры. Гэта нацгвардзейцы, у тым ліку „азоўцы“, памежнікі, тэрабаронаўцы, вайскоўцы Ваенна-марскіх і Узброеных сіл. Таксама двое цывільных, захопленых у Марыупалі. Кожнага дома чакаюць родныя і блізкія. І гэта радасць, што нам удалося вярнуць іх. Сёння яшчэ 189 сем’яў шчаслівыя», — паведаміў Зяленскі.
Як адзначылі ва ўкраінскім Каардынацыйным штабе па пытаннях адносін з ваеннапалоннымі, гэта адзін з самых буйных абменаў з пачатку вайны. Многія з вызваленых прабылі ў расійскім палоне 2,5 года.
«Таксама мы вярнулі тых, хто трапіў у палон на Куршчыне», — удакладнілі ў штабе.
Украінскі бок таксама падзякаваў за пасярэдніцтва Аб’яднаным Арабскім Эміратам.
Гэта 59-ы абмен з пачатку поўнамаштабнага расійскага ўварвання. Агулам з расійскага палону вярнуліся 3956 чалавек, паведамілі ў Каардынацыйным штабе. Рэкордны абмен адбыўся 3 студзеня — тады Украіна абмяняла 230 чалавек.