«Важдзізму» ў Беларусі быць не мусіць, а дыктатуры няма і быць не можа, заявіў Аляксандр Лукашэнка 22 лістапада на сустрэчы са студэнтамі ВНУ.
— «Важдзізму» быць не мусіць. Гэта тое, чаго я баюся ўсё сваё прэзідэнцкае жыццё, — заявіў палітык.
Ён таксама дадаў, што «ніякай дыктатуры» ў Беларусі «няма і быць не можа».
— Бо для таго, каб быць дыктатарам, у цябе павінныя быць рычагі дыктатуры. А якія ў мяне рычагі? Гэта амерыканцы прыдумалі: дыктатар, дыктатар! Як я магу дыктаваць Амерыцы? Сёння Трамп і Байдэн не могуць дыктаваць. У нас што, самая моцная эканоміка? Не, — сказаў Лукашэнка.
Адзначым, што заявы палітыка супярэчаць таму, што гадамі робяць яго прапагандысты. Падрабязна пра тое, як фармуецца культ асобы Лукашэнкі ў сучаснай Беларусі, мы пісалі тут. Што да дыктатуры, то тут прыкладаў яшчэ больш.
Так, напрыклад, на праўладным канцэрце да Дня адзінства 17 верасня выканалі «Баладу пра дыктатара», напісаную ў гонар Лукашэнкі. Акрамя таго, сярод «мерчу Першага» ёсць майка з цытатай палітыка: «Я ж дыктатар. Мне цяжка разумець дэмакратыю». Гэтую фразу Лукашэнка вымавіў у сваім штогадовым пасланні да беларускага народа і Нацыянальнага сходу ў 2022 годзе.
Нічога страшнага ў выкарыстанні слова «дыктатура» ў дачыненні да Беларусі не бачыў палітык і ў 2020 годзе падчас сустрэчы з дзяржсакратаром ЗША Майкам Пампеа.
— Дыктатура — гэта кепска, а калі за ноч вырашылі цяжкую праблему, дыктатура — добра, — заявіў Лукашэнка.
У 2019 годзе прэс-сакратарка палітыка Наталля Эйсмант у інтэрв'ю прапагандысцкаму тэлеканалу АНТ наогул заявіла, што «дыктатура — гэта ўжо наш брэнд».
Чытайце таксама
